Surah ta puphon langsong ngon Bismillah
Alhaldulillah nyoeka seumpurna
Seulaweut taba bekna meu ilah
Keu Rasulullah Panghulee Ambiya
Beureukat Muhammad nikmat meulimpah
Neu bri le Allah ateuh rung donya
Panghule umat yang that amanah
Hantom Neu keubah sikrak rahsia
Yoh mantong hudep Rasulullah
Sabe Neu peugah bak sahbat dumna
Neu yu jak tuntut ileumee Allah
Bah jarak leupah u nanggroe Cina
Nyan kheuh seubab sahbat meutuah
Sinoe lon peugah dua lhee kata
Beudoh jak mita rata daerah
Patna meugah teungku ulama
Di Aceh Timu meusyeuhu leupah
Yohgoh troh langkah kaphe Beulanda
Masa Aceh Seuramoe Meukah
Sinan na dayah di Cot Kala
Ramee ulama dum ceudah ceudah
Luloh dari Dayah bidang agama
Ohka tamat beurangkat bagah
Ho laen daerah jak syiar agama
Jak ba agama rata daerah
Ladom troh langkah u pulo Jawa
Martabat Aceh leubeh seubab na Dayah
Lahe ulama ceudah masa Iskandar Muda
Kayeem ta deungoe rakan meutuah
Kegiatan Dayah rata jeub kota
Lamdom Pasantren geuboh istilah
Lamdom meunasah meunyoe di Desa
Pemda Aceh ka leubeh ceudah
Geubina dayah rata jeub kota
Ngon DPRA buka musyawarah
Bandum deyah anggaran bakna
Geu beuntuk Badan yang peutimang deyah
Hana le geu seurah bak Kanwil Agama
Bustami Usman yang peutimang amanah
Peukeumang dayah beu leubeh bak nyangka
Mangat dudoe nanggroe seuramoe makah
Beu jiwoe marwah lagee nyangka ka
Rata sagoe ta deungoe gah
Ulama ceudah yang muda muda
Sumber daya manusia raya paedah
Lulusan dayah leupah meuguna
Nyan kheuh dudoe adoe meutuwah
Yang peutimang seuramo makah peureute ulama
Ohnoe mumada haba lon kisah
Manfaat dayah keu aneuk bangsa
Beudohta sambot hai rambot mirah
Program peumeurintah wajeeb ta jaga
Pesanteren terpadu pih meusyeuhu leupah
Sama ngon Dayah teumpat cetak ulama
0 Komentar