ACEH MEUTUAH

Assalamualaikom kawom sinaroe

Saleum sijahtra bandum gatanyoe
Alhamdulillah Allah lon pujoe
Beusampoereuna amai hamba nyoe

Seulaweut saleum bandum ta pulang
Keu Nabi Muhammad Panghule insane
Keu wareh sahabat dum seukalian
Ta meuseulaweut bek pre uroe deungon malam

Aceh mulia lon cuba kisah
Lhe ploh thon yang ka dalam meudarah
Ngon tulong Tuhan kana seujarah
Di nanggroe lua janji geu peusah

Ammabakdu teuma laju wahe sahbat
Saboh ceurita ulon baca neu deungo leugat
Kisah Aceh ulon suson dalam nazam
Dari awai hinmgga jinoe deungoe beutrang

Masa Raja Iskandar Muda ato nanggroe
Aceh nyoe meugah dum gob turi rata sagoe
Neumboi limong ji tamong lam catatan
Dalam donya bandum ji turi raja iseulam

Raja ade bak wateenyan hana sakri
Adat ngon hukom hana beeda meu ube sawi
Aneuk kandong yang meuzina laju geu rajam
Tapi jinoe bak geutanyoe tan le meunan

Teuka kaphe ji prang Aceh rata sagoe
Mate ureung han ek bileung geunap uroe
Lhe ploh limong thon Belanda jajah
Bijeh raja bandum mate lam meudarah

Keuturunan raja ji peu gadoh lam silsilah
Hingga jinoe tan soe turi nyang toh khalifah
Nanggroe laen lagee Yokja na keuturunan
Tapi Aceh bandum bijeh ji peukaram

Weh Beulanda teuma teuka awak Jeupang
Rata gampong ureung Aceh tan pakaian
Beungoh seupot bandum rakyat pajoh sagee
Ladom deuk troe uroe malam lom tan bajee

Lhe thon siteungoh Aceh di jajah le awak Jeupang
Hanco nanggroe reuloh geudong deungon jalan
Ureung mate bak wateenyan pih meureutoh
Keureuja rudi uroe malam hana piyoh

Watee merdeka Aceh tundok keu u Jawa
Jeut keu propinsi hanle jibri saboh raja
Hingga jinoe Jawa ato rata sagoe
Peu ta peugah adak beusah han ji deungoe

Aceh kaya deungon wase meuribee macam
Keudeh ulua bandum jib a han ji pulang
Aceh geunap thon geuti taku lam anggaran
Han glah sahoe adak ta bloe bahan bangunan
Glah keu titi han glah keu jalan
Rata sagoe tanging jinoe lam meukubang
Rakyat gampong tan keureuja inong agam
Seubab tan pabrek teumpat tarek pengangguran

Hasan Tiro beudoh sidreo saboh saat
Aceh jinoe wajeb merdeka geukheun teupat
Sideh dilua geu ato program teuntang Aceh
Meuribee cara Aceh lhe sagoe beu ek leubeh

Sideh di Jawa dum pimpinan kalang kabot
Di mita cara kheun Hasan Tiro bekna nyang ikot
Ji kirem tantra teuma laju bak masanyan
Di jak mita tukang kacoe uroe malam

Rata gampong ji pareksa inong agam
Sosah rakyat bak wateenyan uroe malam
Rata gampong jaga malam tuha muda
Yang hana jak ka ji sipak keunong muka

Lhe ploh thon leubeh tanging Aceh dalam rugoe
Ureung gampong lam teukurong malam uroe
Lampoh ngon blang tan tanaman rata sagoe
Ureung gampong dalam deuk troe agam binoe

Dua ribee limong teukeudi Tuhan yang that ade
TNI ngon awak GAM di Helsinki meuduk sare
Meuwapakat awaknyan dua bekle muprang
Mangat Aceh bekle karu uroe malam

Meu ulang ulang dalam rapat goh lom putoh
Yusuf Kalla mita cara hana teudoh
Ngon SBY geu meupakat mita jalan
Mangat ji teurimong bandum janji le awak GAM

Hasan Tiro teutap meukreuh dalam rapat
Weuh keu Aceh yohgoh jeulah timu barat
Padum goe sabe peuget janji Jawa Aceh
Dual he thon adapt hukom lam krung jiweh

Bak kalinyoe Hasan Tiro geu glong gaki
Han geu teeken yoh goh teupat kriban janji
Peungalaman ka geu kalon lam seujarah
Habeh teeken Aceh teutap lam gob jajah

Teuma ache Yusuf Kalla bri keuputosan
Pulang keu Aceh peng yang leubeh wase alam
Otonomi luwah geu peu jeulah dalam janji
Ta ingat beuget bek singoh lom Aceh ji taki

Laen bak nyan dalam MOU pih meusurat
Reintegrasi keu awam Gam pulang mandate
Keu mantan GAM di bayeu peng reuoh reuah
Siploh juta sidroe ureung meunan geu peugah


Rumoh tutong dalam janji pih geu gantoe
Ta ci kalon peuna ji pubut rata sagoe
Meunyoe gohlom beudoh tuntut hai rakan droe
Bak BRA tab a data laju jinoe

Dua ploh limong dua sikureung geunap peut thon
Peuna wase beudoh kalon rata gampong
Aneuk yatim inong balee wajeb tanggang
Tugah BRA geu pareksa rata duson

Irwandi Yusuf yang teupileh lam Pilkada
Dua ngon waki ureung santri Muhammad Nazar
Tugah awaknyan bangun Aceh beuleubeh bak nyangka
Titi ngon jalan bekle leumah lagee paya

Bandum rakyat bekna le lam teudong dong
Buka pabrek teumpat keureuja agam inong
Modal usaha tabri pinjam bekna batah
Mangat rakyat buka usaha peu nyang mudah

Ohnoe dile ulon rika keubhah Aceh
Lon top nazam wahe rakan kureung leubeh
Nurman Syamhas nyang poe kisah cit ka saheh
Undang undang wajeb geu lindong lon bek teupeh