PEUMILU NANGGROE

Saleum horeumat nyopat lon layang

Keu wareh rakan duson ngon kota

Timu Utara teuma lom Seulatan

Di Barat pih saban bandum lon sapa

Bandum geutanyo jinoe ka saban

Phon dari Sabang troh u Papua

Warga neugara dara ngon agam

Lam undang undang hana meubeda

Rata sagoe jinoe hai rakan

Inong ngon agam saleng meulumba

Rata intansi ji bri peuluang

Meuteumee jabatan menurot kada

Troh bidang politek ceureudek saban

Jeut keu anggota dewan agam ngon dara

Hana le hireun wahe buleun trang

Menteri kesehatan yang mat wanita

Ammabakdu laju hai rakan

Kisah ta reupang ngat meuhoe punca

Keubhah peumilu laju ta karang

Soe saleh meunang han troh ta sangka

Dua ribee sikurang buleun ka meujan

Tron lam geulanggang dumna juara

Bak buleun Juli teujadi but nyan

Uroe pemilihan siluruh Indonesia

Peulom di Aceh leubeh gurangsang

Peut ploh pasangan saleng meulumba

Parlok di Aceh geu peuleubeh bidang

Na peut pasang di akui le neugara

Partai SIRA pihna lam kawan

Yang mat pimpinan Muhammad Nazar

Partai Aceh jeub bineh jalan

Ban sabohnyan jilhat bendera

Meunan cit yang laen kayem ta pandang

Rata simpang ji pasang gamba

Partai tuha pih lagenyan

PDI Perjuangan deubgon Golkar

Awak P lhee pih teuntee saban

PKS ngon buleun bintang meulumba lumba

Musem kampanjeu ngat jitupeu nan

Beu ji pileh gobnyan meunan keunira

Teuma ta harap ubak awaknyan

Dalam geulanggang bekna meudakwa

Ureung yang talo baho beukeumang

Peureutee yang meunang bek pehpeh dada

Kareuna rakyat martabat gata manyang

Meukawan kawan ji bri suara

Oh jeut gata keu anggota dewan

Hanle ta keunong jasa rakyat bha

Wahe dum rakyat ingat beupanyang

Dalam peumilihan beuget ta jaga

Yang carong peh keureupok bek tajok meunang

Seubab haba nyan bandum sandiwara

Geutanyoe dikeubah leupah jih riwang

Oh meurumpok bak jalan jitem boh muka

Ramee conto jinoe hai rakan

Oh jeut keu anggota dewan siat ka kaya

Peumilu di Aceh beu leubeh teunang

Bekle gangguan damee yang kana

Meyoe karu lom ji trom meureuyam

Aceh nyoe guncang leubeh bak nyangka

Ohnoe dilee keumbee on mancang

Watee laen jan ta sambong teuma

Leubeh lom gura haba peuneusan

Watee lam geulanggang awak mita suara.

Samhas